Sálfræðimeðferð með dýrum

​​​

Sálfræðimeðferð með hestum er meðferðarform sem hefur þróast hratt síðustu ár og er nú nýtt í fjölmörgum löndum um allan heim. Hestar eru næm hópdýr sem hafa þróað með sér ríka hæfni til að nema breytingar í umhverfi sínu og bregðast við þeim. Þessa næmni má nýta á markvissan hátt í meðferðarvinnu.

 

Í sálfræðimeðferðinni er unnið með hestinum frá jörðu en ekki farið á bak. Meðferðaraðili og skjólstæðingur vinna saman að verkefnum þar sem samskipti, viðbrögð og hegðun hestsins geta skapað tækifæri til sjálfsskoðunar, tilfinningavinnu og aukinnar meðvitundar um líðan og tengsl. Meðferðarformið hefur meðal annars reynst gagnlegt fyrir börn og ungmenni með hamlandi kvíða, áfallastreitu, sorgarviðbrögð, athyglisvanda, félagslegar áskoranir eða röskun á einhverfurófi.

 

Fyrir sum börn getur verið erfitt að mæta í hefðbundna samtalsmeðferð. Reynslan sýnir að nærvera dýra getur hjálpað sumum að upplifa meira öryggi og auðveldað þeim að taka þátt í meðferðinni, jafnvel þegar unnið er með erfið eða tilfinningalega krefjandi málefni.

 

Á Hlöðuloftinu eru dýr ekki notuð til afþreyingar eða eingöngu til að skapa notalegt umhverfi heldur  þe þjóna þau skýru meðferðarmarkmiði. Unnið er út frá gagnreyndum sálfræðilegum nálgunum og áfallamiðuðum aðferðum, meðal annars EMDR, Eagala og EquiLateral.

​

Í vinnu með hundum er lögð áhersla á tengslamyndun, öryggi og samvinnu. Hundar eru félagslynd rándýr sem hafa í gegnum sambýli sitt við manninn þróað sterka þörf fyrir að tilheyra, vinna með öðrum og bregðast við félagslegum vísbendingum. Þeir leitast oft við að þóknast og tengjast fólki á einlægan og beinan hátt sem getur auðveldað sumum skjólstæðingum að upplifa öryggi, ró og tengingu í meðferðaraðstæðum. Á Hlöðuloftinu eru hundar nýttir markvisst þegar það þjónar skýru meðferðarmarkmiði og byggir vinnan meðal annars á sérhæfðri þekkingu á animal-assisted interventions. Þorkatla Elín Sigurðardóttir lauk meðal annars K9 Intervention Specialist námi frá University of Denver í desember 2024.

 

Lögð er áhersla á heildræna nálgun þar sem unnið er með tengingu líkama, taugakerfis, tilfinninga og upplifunar. Í þeirri vinnu geta dýr stutt við aukna öryggiskennd, líkamsvitund, tilfinningastjórn, tengslamyndun og jarðtengingu á hátt sem stundum er erfitt að ná fram eingöngu í samtali.

 

Á Hlöðuloftinu er um að ræða sálfræðimeðferð þar sem dýr eru nýtt sem stuðningur við meðferðarferlið. Dýrið sjálft er ekki meðferðaraðili heldur hluti af skipulögðu meðferðarumhverfi sem byggir á faglegri þekkingu, áfallafræðum og gagnreyndum aðferðum.

Mikil áhersla er lögð á velferð dýranna. Ekki henta öll dýr í slíka vinnu og vandlega er hugað að skapgerð, þjálfun, öryggi og líðan þeirra. Dýr eru ekki sett í aðstæður sem valda þeim óþarfa streitu eða álagi.

Metið er hvort notkun dýra þjóni hagsmunum skjólstæðings og dýrsins sjálfs. Ef talið er að markmið meðferðar náist án þátttöku dýra er það valið.

 

Athugið að vegna nálægðar við dýr getur meðferðaraðstan í hesthúsinu ekki talist hentugt umhverfi fyrir einstaklinga með verulegt dýraofnæmi.